𝐕𝐀𝐑𝐀𝐕𝐀𝐑𝐀𝐍𝐀 𝐌𝐈𝐒𝐎𝐊𝐀𝐓𝐑𝐀 :
« 𝐍𝐘 𝐙𝐎 𝐒𝐘 𝐀𝐃𝐈𝐃𝐈𝐍’𝐍𝐘 𝐓𝐎𝐌𝐏𝐎𝐍-𝐓𝐀𝐍𝐘 : 𝐎𝐋𝐎𝐍-𝐓𝐒𝐎𝐓𝐑𝐀 𝐍𝐀 𝐅𝐀𝐍𝐉𝐀𝐊𝐀𝐍𝐀 »

Tontosa ny 23 septambra lasa teo ny hetsika Varavarana Misokatra, izay nifantoka tamin’ny lohahevitra « Zo sy adidin’ireo tompon’ny tany : olon-tsotra na Fanjakana ». Notanterahina tany amin’ireo toerana efatra izany, dia :

🔹 𝐓𝐎𝐀𝐌𝐀𝐒𝐈𝐍𝐀 𝐈𝐈 : Tonga maro tao amin’ny Biraon’ny Sampandraharahan’ny Raharahantany ny vahoaka, notarihin’ny Delegué sy ireo Ben’ny Tanàna. Nifantoka tamin’ny fanazavana momba ny fananan-tany, indrindra ny zo sy ny adidin’ny tompon-tany, na olon-tsotra na Fanjakana, ary ireo tranga samihafa mety miseho ny fifanakalozana. Nohazavaina ihany koa ny andraikitry ny Sampandraharahan’ny Fananantany sy Fandrefesan-tany, ary nomena toromarika ny vahoaka momba ireo birao tokony hirosoana mifanaraka amin'ny ny raharaha atao. Vokatr’izany, nihamora tamin’ny vahoaka ny fahazoana ny fomba fiasa amin’ny fahazoana ny boky tany, ny karatany ary ny ODOC.

🔹 𝐓𝐎𝐀𝐌𝐀𝐒𝐈𝐍𝐀 𝐈 : Notontosaina teo amin’ny tokontany malalaky ny Birao Fandrefesan-tany ny hetsika, izay nifantoka tamin’ny fanazavana momba ny zo sy ny adidy amin’ny fananantany. Maro ireo fanontaniana sy fanamarihana napetraky ny mpanatrika, indrindra mahakasika ny fanarahana ireo dosie alefa aty Antananarivo sy ny ODOC. Nahitana fahalianana sy fandraisana anjara betsaka avy amin’ny vahoaka ny hetsika.

🔹 𝐓𝐀𝐎𝐋𝐀𝐆𝐍𝐀𝐑𝐎 : Nizotra tamim-pilaminana ny Varavarana Misokatra. Ny tapany voalohany dia natokana ho an’ny famelabelarana ny lohahevitra « Zo sy adidin’ireo tompon’ny tany : olon-tsotra sy Fanjakana ». Ny tapany faharoa kosa dia natokana ho an’ny famaliana ireo fanontaniana sy ahiahin’ny mpanatrika, ary ny fandraisana ireo soso-kevitra. Nahitana fandraisana anjara mavitrika avy amin’ny mpanatrika ny hetsika, ka nahafahana namantatra ireo olana sedrain’ny mponina eo amin’ny sehatry ny fananantany.

🔹 𝐀𝐌𝐎𝐑𝐎𝐍’𝐈 𝐌𝐀𝐍𝐈𝐀 : Ny Sekretera Jeneralin’ny Prefektioran’Ambositra no nanokatra sy namarana ny fotoana. Sehatra lehibe nahafahana nanome fanazavana sy vaovao feno mahakasika ny raharahan-tany ity Varavarana Misokatra ity, ary indrindra nahafahana nihaino ny fitarainana sy ny soso-kevitr’ireo vahoaka maro nanatrika. Maro ihany koa ireo fanontaniana napetraky ny mpanatrika ka nahazo valiny sy fanazavana avy amin’ireo tompon’andraikitra.

👉🏻 Amin’ny alalan’izao hetsika izao dia mitohy ny ezaka ataon’ny Ministeran’ny Fanajariana ny Tany sy ny Raharahan-tany (MATSF) amin’ny fanamafisana ny fifandraisana amin’ny vahoaka sy ny fanomezana fanazavana mazava momba ny raharahan-tany.